A Cámara de Comercio ofreceu 77 visitas e xornadas divulgativas sobre emprendemento para 3.660 alumnos de Santiago durante 2012
- Detalles
- Categoría: Cámara Santiago
- Published: Venres, 04 Xaneiro 2013 23:00
- Visitas: 421
A participación do alumnado incrementouse un 70% con respecto ao ano anterior
Desde o Departamento de Creación de Empresas da Cámara de Comercio de Santiago desenvolvéronse en 2012 unha serie de xornadas de fomento do espírito emprendedor no ámbito educativo para escolares de Santiago de Compostela. Estas xornadas organizáronse coa colaboración do Fondo Social Europeo e o Ministerio de Educación, dentro do programa de Xornadas de Fomento do Espírito Emprendedor na Escola, e en casos concretos contouse coa participación do Programa Santiago Investors Support 2012 do Concello de Santiago.
Celebráronse 40 visitas guiadas ao viveiro de empresas de Costa Vella e 37 charlas divulgativas a centros escolares da demarcación cameral. Nestas actividades participaron un total de 3.660 alumnos. A responsable do viveiro de empresas, Rosa Cardeso, amosou a súa satisfacción polos resultados acadados, que superan nun 70% a participación do alumnado de 2011. Segundo explica Cardeso, para avanzar no emprego, igualdade, crecemento, competitividade e innovación, resulta indispensable fomentar o espíritu emprendedor na xuventude e mesmo na infancia. “A educación pode contribuír enormemente á creación dunha cultura emprendedora, empezando polos máis novos e na escola, porque a sociedade benefíciase impulsando actitudes e capacidades emprendedoras” –indica Rosa Cardeso–.Estas xornadas de fomento do espírito emprendedor na escola continúan este mes con catro novas accións no Colexio Nosa Señora dos Remedios de Santiago, o IES Xelmírez I e o CIFP Compostela. Desde a Cámara aseguran que entre os obxectivos da educación ten que estar sempre presente o fomento da cualidades personais que constitúen a base do espírito emprendedor: creatividade, iniciativa, responsabilidade, capacidade de afrontar riscos e a independencia e autonomía no traballo.
A finalidade destas xornadas é contribuír ao desenvolvemento das cualidades personais relacionadas co emprendedor desde idades temperás; fomentar as iniciativas emprendedoras desde o ámbito educativo, potenciar os valores empresariais e informar, sensibilizar e transmitir a opción do autoemprego como unha alternativa digna e viable.
As visitas guiadas ao viveiro de empresas permiten ao alumnado coñecer de primeira man o funcionamento da incubadora empresarial e os servizos que o Departamento de Creación de Empresas presta aos emprendedores e empresarios da demarcación cameral. Para pechar estas visitas, os alumnos asisten a unha charla sobre a experiencia profesional e vital dalgún emprendedor ubicado no viveiro de Costa Vella. Ademais, o Departamento de Creación de Empresas cameral programa unha xornadas divulgativas nos centros escolares para orientar e sensibilizar aos alumnos sobre o espírito emprendedor.