As tres universidades laborais de Galicia (A Coruña, Vigo e Ourense), obxecto de estudo nunha publicación do Colexio de Arquitectos de Galicia realizada por Antonio Río Vázquez

Detalles

Categoría: Colexio Arquitectos Galicia

Published: Xoves, 04 Agosto 2011 11:41

Visitas: 520

O autor sostén que son tres exemplos de recuperación da modernidade da arquitectura española trala Guerra Civil

O libro preséntase esta tarde na Feira do Libro de A Coruña

O Colexio de Arquitectos de Galicia presenta hoxe na Feira do Libro de A Coruña, ás 8 da tarde, Las Universidades Laborales gallegas. Arquitectura y modernidad, obra de Antonio Río Vázquez. Ademais do autor asistirán como representantes colexiais o presidente da Delegación de A Coruña, José Manuel López Mihura, e o presidente da Comisión de Cultura do COAG, Fernando Martínez.

A publicación, editada polo COAG, analiza as tres universidades laborais construídas en Galicia, entre 1960 e 1975, que constitúen bos exemplos da  recuperación da modernidade na arquitectura española logo da Guerra Civil e a inmediata autarquía, segundo explica Antonio Río: “O máis notable é como se entende en cada un dos proxectos a recuperación da modernidade. No caso da Coruña, vencellada ao Movemento Moderno ortodoxo e tomando como referente a arquitectura naval; en Ourense, incorporando aspectos vernáculos e retomando a monumentalidade; e en Vigo, entendéndoa como unha cidade en rede, aberta e fragmentada”. A súa principal aportación arquitectónica, engade o autor, é a aceptación definitiva da modernidade no edificio escolar, “fronte á escola concibida ao modo tradicional da etapa autárquica”, matiza.

A Universidade Laboral de A Coruña foi proxectada por Luis Laorga Gutiérrez, xunto ao arquitecto galego José López Zanón; a de de Vigo polo tamén galego José López Candeira; e a de Ourense polo madrileño Julio Cano Lasso, quen asinou varias obras en Galicia. Río indica que actualmente son tres edificios en “mal estado de conservación e escasamente divulgados”, pero subliña que ofrecen respostas “moi diferentes” en cada contexto determinado, e conclúe que se converteron na busca do significado da modernidade para os seus respectivos arquitectos.

O libro de Río, de 192 páxinas e editado en rústica, contén abundante material gráfico, “en boa parte inédito e cedido polos arquitectos en exclusiva para esta publicación” –agrega o autor. As imaxes da cuberta son obra da fotógrafa coruñesa Raquel Castro. Antonio Río Vázquez (A Coruña, 1981) é arquitecto, profesor na Escola Técnica Superior de Arquitectura de A Coruña, membro do Grupo de  Investigación en Historia da Arquitectura da UDC e editor do Boletín Académico. Revista de investigación y arquitectura contemporánea.