O colectivo realizará charlas informativas, fichas gráficas, unha memorias tipo e creará un foro de consultas para os diversos axentes implicados na construción

O Colexio Oficial de Arquitectos de Galicia (COAG) e o Instituto Galego de Vivenda e Solo (IGVS) asinaron hoxe un convenio de colaboración para traballar conxuntamente no desenvolvemento das Normas de Habitabilidade de Vivendas de Galicia. O acto, que se celebrou na Consellería de Medio Ambiente da Xunta de Galicia, estivo presidido polo conselleiro de Medio Ambiente en calidade de presidente do IGVS, Agustín Hernández, e o decano do COAG, Celestino García Braña.

O obxecto deste convenio é definir o cadro específico de colaboración entre o IGVS e o COAG para concretar o proceso formativo, divulgativo e informativo do Decreto das Normas de Habitabilidade de Vivendas de Galicia e de facilitar aos colexiados do COAG a información máis precisa sobre dito decreto. O convenio terá vixencia ata o 30 decembro de 2010.

O COAG, comprométese a organizar e difundir as charlas informativas, confección de fichas gráficas, soporte web de memorias tipo e participación na creación do foro de consultas. “Ofreceremos charlas divulgativas para que os diversos sectores construtivos e os arquitectos teñamos cumprida noticia do decreto. Realizaranse fichas gráficas para que os promotores,  construtores, técnicos e mesmo usuarios saiban en que condicións deben facer as súas vivendas. Ademais, abrirase un foro de consultas para poder perfeccionar e engadir temas á normativa” –indicou García Braña.

Pola súa parte, o IGVS comprométese a facilitar toda a información documental, ferramentas e apoio técnico que sexan precisos para a realización de todos os apartados  contidos no convenio, dispoñendo dos recursos humanos e materiais necesarios para levar a bo fin este convenio.

Segundo García Braña, na maioría dos casos a parte máis sinxela dos decretos e as leis é a súa publicación no boletín oficial correspondente, pero o máis complexo é “facer que cumpran o seu cometido e, como acontece neste caso, sirvan para que todo o proceso construtivo se realice coa menor dificultade posible”.