O Instituto de Cerámica de Galicia, pertencente á Universidade de Santiago, patenta unha fibra illante a partir de residuos de lousa
- Detalles
- Categoría: CITT-USC
- Published: Luns, 01 Marzo 2010 00:00
- Visitas: 951
O Instituto de Cerámica de Galicia (ICG) nace en 1990, froito do traballo do Grupo de Cerámica do Departamento de Edafoloxía da Universidade de Santiago. É un centro pioneiro en investigación e desenvolvemento no eido da cerámica e doutros materiais industriais.
O Instituto está integrado por unha vintena de profesionais, entre eles físicos, químicos, enxeñeiros e técnicos. O centro é mixto, xa que pertence tanto a empresas como á Universidade. Tal como sinala o seu director, Francisco Guitián Rivera, cando naceu dedicábase principalmente ao estudo da cerámica pero agora isto “só ocupa o 20% do noso labor, centrámonos máis en investigar con todo tipo de materiais industriais, en crealos, mellorar a súa calidade ou ampliar os seus usos”.
Na actualidade as investigacións do Instituto están moi orientadas ao traballo coa biocerámica, a purificación do silicio (en colaboración coa empresa Ferroatlántica), os cristais fotónicos e as fibras de alta resistencia.
O equipo dispuxo de tecnoloxía industrial soviética para obter as fibras
O ICG vén de patentar un procedemento para obter unha fibra continua illante a partir dos residuos de lousa e doutras rochas industriais. “No Barco de Valdeorras tíranse cada ano miles de toneladas de residuos e o que fixemos foi buscarlles un uso”, afirma Guitián. Explica que “este traballo realizámolo en colaboración cunha empresa de Valdeorras e dun instituto de investigación de Ucranía, grazas ao cal puidemos dispor de tecnoloxía industrial soviética para a obtención das fibras”. Froito do éxito desta iniciativa, o Instituto participa na montaxe dunha planta na localidade ourensá do Barco, destinada á obtención da fibra de xeito industrial.
O traballo do Instituto deu lugar á creación de tres empresas que xa se lanzaron ao mercado. Unha delas é Neoker, a única produtora mundial de whiskers de alúmina, un material cerámico de alta resistencia e con múltiples aplicacións industriais. Por outro lado están Keramat, creada en 1999 e que segue a ser a única empresa española fabricante de biocerámicas; e Mifibra, nacida recentemente para a creación de fibras minerais a partir dos residuos de lousa. Ademais, o Instituto xa posúe 24 patentes nacionais e 8 internacionais.