O sábado todo o día e o domingo pola mañá, novos talleres sobre a muralla de Santiago no Museo das Peregrinacións

Trátase de que nenos de 6 a 12 anos comprendan, a través de xogos, por que noutra época a cidade estaba amurallada e hoxe non

Loitarán con espadas feitas con globos para defender a Catedral

O Consorcio de Santiago continúa coa súa proposta de ofrecer talleres a nenos de entre 6 e 12 anos sobre a antiga muralla medieval que rodeaba a cidade compostelá. Esta fin de semana repítese esta experiencia, que se está a desenvolver no Museo das Peregrinacións e de Santiago (sede Praza das Praterías).

Os rapaces interesados poderán participar nesta iniciativa o sábado pola mañá entre as 11:00 e as 13:00 horas e pola tarde entre as 16:00 e 18:00 horas. E o domingo pola mañá, entre as 11:00 e as 13:00 horas. Para iso deberán inscribirse de xeito gratuíto no propio museo ou a través do correo electrónico Este enderezo de correo está a ser protexido dos robots de correo lixo. Precisa activar o JavaScript para velo.. Haberá máis talleres nas vindeiras fins de semana de decembro e ata mediados de xaneiro.

As actividades principais estanse a realizarar no Museo das Peregrinacións, aínda que os días con bo tempo os rapaces teñen a oportunidade de desprazarse cos monitores a algúns dos espazos relacionados coa antiga muralla. A finalidade é que, a través de diferentes xogos e propostas de carácter lúdico, os rapaces, tanto os máis pequenos como os maiores, comprendan por que noutra época a cidade de Santiago estaba amurallada e hoxe en día xa non tería sentido.

Os nenos de menor idade convértense en protagonistas de loitas, emulando aos cabaleiros da Idade Media. Así, na Porta Santa da Catedral de Santiago combaterán os “Cabaleiros da Orde de Santiago” con inimigos viquingos que queren invadir a Catedral. Cada un deles terá que debuxar a súa insignia e ademais elaborarán espadas coa técnica da globoflexia. Trátase primeiro de que defendan a Porta Santa e logo toda a Catedral, para que vexan a importancia de contar cun elemento defensivo como eran as murallas.

No caso dos maiores, búscase que comprendan todos estes aspectos pero dun xeito máis reflexivo. O obxecto é que cheguen a entender que na actualidade as murallas xa non son útiles nin necesarias.