O trompetista Luís González inicia as clases maxistrais da Escola de Altos Estudos Musicais
- Detalles
- Categoría: Consorcio de Santiago
- Published: Xoves, 24 Outubro 2013 18:38
- Escrito por Eva
- Visitas: 558
Esta iniciativa diríxese a músicos profesionais e afeccionados
A Escola de Altos Estudos Musicais (EAEM) conta cun programa de formación permanente dirixido a todos os músicos galegos, tanto no ámbito profesional como no afeccionado, interesados neste eido. No marco deste programa, ofrécese a posibilidade de asistir ao longo do ano a unha serie de clases maxistrais que imparten solistas de recoñecido prestixio internacional.
Entre outubro e decembro impartiranse clases maxistrais de trompeta, frauta, óboe, clarinete, percusión, violonchelo e trompa. A primeira clase maxistral deste curso celébrase hoxe xoves e mañá venres nas instalacións da Escola. O trompetista valenciano Luis González achegará aos alumnos asistentes os seus coñecementos e experiencia con este instrumento.
O músico recuperou e gravou o repertorio máis importante para trompeta dos compositores españois dos séculos XX e XXI
Luis González comezou a estudar trompeta na escola da banda da súa cidade -Silla- e rematou os seus estudos superiores no Conservatorio Superior de Música de Valencia, que logo perfeccionou en París e Suecia. En 1989 ingresou na Orquestra Sinfónica de Baleares e obtivo a praza de profesor do Conservatorio Profesional de Palma de Mallorca, cidade na que permaneceu ata 1994. Dende 1994 a 2005 foi trompeta solista da Orquestra Sinfónica de Madrid e dende 2004 ata 2011 profesor do Conservatorio Superior de Música do Liceu en Barcelona. Na actualidade é profesor de trompeta no Centro Superior de Música do País Vasco, actividade que compaxina co seu traballo interpretativo de solista.
Foi profesor da Xove Orquestra da Comunidade de Madrid, da Academia da Real Filharmonía de Galicia e da Xove Orquestra Nacional de España. Ademais, impartiu clases en prestixiosos conservatorios e academias de música de Portugal, Francia, Alemaña, Colombia e Venezuela, entre outros. E ten formado parte do xurado en recoñecidos concursos nacionais e internacionais de trompeta.
O músico toca con importantes orquestras de todo o país. E forma dúo estable co pianista José Gallego, co que ten recuperado e gravado o repertorio máis importante para trompeta dos compositores españois dos séculos XX e XXI.