Máis de 100 estudantes de 30 centros de ensino secundario de toda Galicia xa se inscribiron na VI Olimpíada Galega de Bioloxía
- Detalles
- Categoría: Colexio Biólogos Galicia
- Published: Domingo, 14 Novembro 2010 23:00
- Visitas: 764
O certame, que se celebrará a principios do vindeiro ano en Santiago, diríxese a estudantes de segundo de bacharelato
O vindeiro mes de xaneiro, o día 14, celébrase a Olimpíada Galega de Bioloxía. Estas probas, que xa cumpren a súa sexta edición, realizaranse este ano na Facultade de Bioloxía da Universidade de Santiago. O certame diríxese aos alumnos que cursan segundo de bacharelato. Na súa organización colaboran o Colexio Oficial de Biólogos de Galicia -COBGA-, as tres universidades galegas (A Coruña, Santiago e Vigo) e a Xunta de Galicia.
Hoxe remata o prazo de inscrición para os estudantes interesados en participar nestas probas. Deben solicitalo por escrito a través do boletín de inscrición que figura na páxina web do certame www.olimpiadadebiologia.edu.es.
Segundo os datos aportados polo coordinador destas probas na comunidade galega, o biólogo Pedro Nozal Cantarero, ata o de agora inscribíronse máis de cen alumnos procedentes de máis de 30 centros educativos de toda Galicia.
Os gañadores representarán a Galicia na Olimpíada Nacional, que se celebrará en Granada en abril de 2011
A organización do certame establece un número máximo de catro estudantes por centro educativo, ademais doutros catro suplentes por se algún dos seleccionados non se puidera presentar. Os alumnos elixiranse en base ás cualificacións obtidas en Bioloxía e Xeoloxía no primero curso de bacharelato. Co fin de que poidan participar o maior número de centros posible, escollerase o estudante mellor cualificado de cada centro e, os restantes, ata que se completen as prazas. Os seleccionados daranse a coñecer a partir do 5 de decembro.
Os tres gañadores da fase galega representarán á comunidade autónoma na fase nacional, que este ano se celebrará en Granada en abril do vindeiro ano. Ademais, cada unha das tres universidades galegas concederán unha axuda de 300 euros aos gañadores por matriculárense en calquera das súas facultades.