O programa Xentes, espazos e lugares do Colexio de Arquitectos de Galicia chega a Lugo coa conferencia do colectivo Zuloark
- Detalles
- Categoría: Colexio Arquitectos Galicia
- Published: Venres, 05 Outubro 2012 10:33
- Visitas: 594
Este ciclo pretende implicar á sociedade no coñecemento do territorio e a realidade urbana
A charla será o próximo xoves-11, ás 19:30 horas na Delegación de Lugo do Colexio de Arquitectos
O Colexio de Arquitectos de Galicia continúa a semana próxima en Lugo co ciclo Xentes, espazos e lugares, un programa de actividades vencellado ao Proxecto Terra co que se pretende implicar á sociedade galega no coñecemento do territorio e a realidade urbana. Charlas, encontros, debates e obradoiros conforman esta iniciativa de divulgación e formación non regrada que busca a participación non só de arquitectos e urbanistas, senón tamén de artistas plásticos, xeógrafos, xornalistas, escritores, sociólogos e de toda a sociedade.
O Colectivo Zuloark ofrecerá o próximo xoves, 11 de outubro, ás 19:30 horas, unha conferencia na Delegación de Lugo do Colexio de Arquitectos (rúa Puro Cora Xornalistas, 1. Lugo) titulada “Urbanleaks”. Zuloark é un colectivo formado maioritariamente por estudantes de arquitectura que traballan experimentando a arquitectura en todas as súas formas posibles e incorporándoa á vida cotiá da cidade en modos imaxinativos e moi participativos. Algúns dos seus traballos tiveron o recoñecemento da Bienal Española de Arquitectura e Urbanismo.