O Colexio de Arquitectos presenta Obradoiro 34, unha publicación que reflexiona sobre o feito e o pensamento arquitectónico galego e internacional
- Detalles
- Categoría: Colexio Arquitectos Galicia
- Published: Xoves, 14 Xuño 2012 15:54
- Visitas: 550
Jorge Duarte, decano do Colexio de Arquitectos:
“É importante que a sociedade valore o traballo dos arquitectos, cultural e economicamente”
Carlos Quintáns e Carlos Pita, directores da revista:
“É un espazo de reflexión, onde hai tempo para botar unha mirada máis intensa á realidade arquitectónica, con liberdade expresiva”
O Colexio de Arquitectos de Galicia presentou hoxe o número 34 da revista OBRADOIRO “O LIMITE”. O acto contou coa presenza do decano do Colexio de Arquitectos, Jorge Duarte; o presidente da Comisión de Cultura, Fernando Martínez; e os directores da revista, Carlos Quintáns e Carlos Pita, ademais doutros arquitectos colexiados que asistiron á presentación.
A publicación está considerada un mosaico representativo da arquitectura galega contemporánea que ten por obxecto proxectar a dimensión cultural da arquitectura; e amosa unha extraordinaria expresividade visual grazas á súa gran cantidade de fotografías, planos e maquetas, que a fan realmente atractiva. A revista será distribuída entre todos os colexiados, en institucións académicas e en librarías especializadas e de gran alcance. A partir de mañá venres, 15 de xuño, estará á disposición dos colexiados que teñan subscrito o servizo de publicacións nas súas respectivas Delegacións.
Jorge Duarte manifestou a súa satisfacción por este número, que segundo apuntou sae á rúa en tempos de crise para o sector da construción, para o Colexio de Arquitectos e para todos. “É un momento no que hai que reivindicar traballos serios, de reflexión e profundos que aporten coñecemento”– indicou Duarte–.
O decano subliñou que o Colexio de Arquitectos aposta polo labor de difusión da cultura arquitectónica, un dos seus obxectivos básicos “irrenunciables”. “Achegar a cultura arquitectónica á sociedade permitirá que esta actúe, cando sexa necesario, con maior coñecemento sobre o territorio e que valore moito máis o que poden aportar os arquitectos” –matizou–.
Sobre a situación do mercado inmobiliario, Jorge Duarte explicou que o colectivo dos arquitectos está, ao igual que o resto da sociedade, “asustado, en pausa e espera” pola situación económica mundial, intentando sobrevivir e exercendo o máis dignamente posible a profesión. “É importante que a sociedade valore o traballo dos arquitectos, cultural e economicamente” –apuntou–.
Segundo Duarte, unha saída para os arquitectos é apostar por pequenas obras, rehabilitacións, a conservación do existente, cambiando o modelo de construción para fixar a vista sobre o xa edificado, sempre aportando sentido común e solucións económicas para os clientes.
Un espazo para a reflexión
A revista Obradoiro é a única publicación especializada en arquitectura que hai en Galicia. Foi elaborada durante o inverno de 2009 pero non conseguiu ver a luz ata agora debido a crise económica destes últimos anos. Malia este contratempo, os seus directores aseguran que os contidos deste número seguen tendo vixencia e interese. Pita e Quintáns repiten experiencia tras dirixir xa o anterior número da revista onde se abordaba “o pequeno, a pequena escala”.
Os seus directores explican que Obradoiro 34 quere indagar na necesidade de definir o “límite” e na intensidade que xera a súa presenza. Existen límites naturais ou construídos que marcan fronteiras e territorios, tamén límites de seguridade, límites agrícolas coñecidos como marcos, límites urbanos que separan o público do privado, ou mesmo límites marcados polo clima e os costumes sociais e culturais.
Quintáns destacou a importancia de transmitir a información e todo o material da revista en formato papel, para que o público en xeral poida gozar da reflexión sobre o límite que impoñen as edificacións xa construídas.
Pola súa parte, Carlos Pita lembrou que a revista Obradoiro non pretende seguir a actualidade arquitectónica, sinxelamente “é un espazo de reflexión, onde hai tempo para botar unha mirada máis intensa á realidade arquitectónica, con liberdade expresiva”.
Anécdotas da personalidade e obra do alemán de Camelle
Entre os principais contidos da publicación destaca un artigo sobre a vida e obra artística de Manfred Gnädinger, coñecido en terras galegas como Man de Camelle. “Sobrevoamos os aspectos máis anecdóticos da súa personalidade e profundizamos no seu legado artístico”. Para elaborar o documento tiveron acceso a un arquivo oculto, agochado na casa que o artista alemán tiña no Concello de Camelle, e que agora a fundación que leva o seu nome está catalogando. “Apreciamos situacións persoais postas ao límite da creatividade e da vida propia” –salientou Quintáns–.
Igualmente, a revista Obradoiro recolle a pegada artística de Romualda, unha muller holandesa afincada en cabo de Gata, cunha obra moi próxima a de Man, que tampouco se impón límites á hora de expandir a súa creación artística.
Obradoiro 34 preséntase nun volume de 18,8 x 24,4 centímetros, con portada protagonizada por unha fotografía do galego Vari Caramés, ten 370 páxinas, numerosas fotografías e planos ilustrativos dos proxectos, ademais de debuxos e bocetos. A descrición dos proxectos vai acompañada dun texto explicativo do propio autor, ou mesmo da memoria que se xunta a cada proxecto. A maioría das veces, a opinión dun arquitecto completa a reseña.
|
O primeiro Obradoiro, en 1978
En 1978 a Comisión de Cultura do Colexio de Arquitectos editaba o primeiro número da revista Obradoiro, instrumento aberto de información, estudo e discusión sobre todo o relacionado coa arquitectura, urbanismo, construción e medio ambiente.
Coa súa política de publicacións, o Colexio de Arquitectos de Galicia pretende estar presente de forma activa na sociedade galega en todas aquelas cuestións que garden relación coa calidade de vida, patrimonio histórico e cultural colectivo e coa ordenación e desenvolvemento de Galicia. O Colexio aposta polo seu labor editorial establecendo lazos de colaboración con institucións, organismos ou entidades que permitan o aproveitamento de sinerxias no ámbito da investigación. Realizáronse coedicións e colaboracións con universidades e institucións culturais, consellerías da Xunta de Galicia, Administración local, fundacións e editoriais, outros colexios de arquitectos, a ETSA da Coruña ou o Docomomo, entre outras entidades.