Emprendedores do viveiro de Costa Vella participarán no encontro nacional de viveiristas

emprenderA responsable da incubadora, Rosa Cardeso, impartirá unha sesión informativa sobre boas prácticas financeiras para o emprendemento

Celebrarase mañá xoves no municipio madrileño de San Sebastián de los Reyes

O viveiro de empresas da Cámara de Comercio de Santiago participará no III Encontro Nacional de Viveiristas, que se celebrará mañá xoves, 14 de marzo, no Centro de Formación de San Sebastián de los Reyes (Madrid). Asistirán catro emprendedores –as empresas 4Gotas, Aguilar Abogados, Wayna Consultora e Innovación Sostenible–, acompañados pola responsable da incubadora empresarial, Rosa Cardeso.

A xornada está subvencionada con Fondos FEDER, a través da Fundación INCYDE (Instituto Cameral para la Creación y Desarrollo de la Empresa); e pola Dirección General de Industria y de la PYME (DGPYME), a través do Concello de San Sebastián de los Reyes, ACENOMA e a Asociación para el Fomento de la Innovación en Madrid Norte (INNOVRMADRID), baixo o lema “Emprende en RED: SE+”.

Espérase unha asistencia de máis de 200 empresarios e xestores de viveiros de toda España e emprendedores que conforman a rede de Incyde, composta por máis de 96 incubadoras empresariais. Ademais de participar en interesantes relatorios orientados a aumentar o potencial de crecemento empresarial, os asistentes poderán establecer novas vías de negocio e intercambiar coñecementos.

Rosa Cardeso impartirá unha sesión sobre boas prácticas financeiras en materia de emprendemento. “Unha das principais dificultades a hora de emprender é a falta de recursos e apoio financeiro por parte das entidades bancarias, que seguen concedendo maior importancia aos avais que á viabilidade do proxecto emprendedor” –salienta Cardeso–. Os emprendedores e empresarios continúan atopándose barreiras no acceso ao financiamento, aspecto que condiciona o éxito ou fracaso empresarial.

As pequenas e medianas empresas representan actualmente un 96 por cento do tecido produtivo. Consciente da problemática que as pemes presentan para acceder a financiamento, a Cámara de Comercio de Santiago asinou recentemente unha serie de convenios de colaboración con entidades financeiras.

Ademais, a Cámara actúa como interlocutora eficaz nas relación entre o emprendedor e a entidade bancaria correspondente, e emite un certificado de viabilidade (selo Cámara) que ten como obxectivo facilitar o acceso ao crédito, ao garantir que os proxectos reúnen os requisitos necesarios para ter éxito e consolidarse no tempo.

Este encontro ten como propósito acelerar o desenvolvemento empresarial dos viveiristas e participar nunhas xornadas de networking activo, aproveitando tanto os seminarios como as sinerxias que se producirán entre eles. Con este fin estableceránse reunións bilaterais entre os empresarios, coñecidas como sesión B2B, onde poderán explorar áreas de interese común.

Por outro lado, realizarase unha capacitación dos responsables dos viveiros de empresas a través de mesas redondas, boas prácticas e outros seminarios cos que terán acceso a novos coñecementos e habilidades aplicables ao día a día na xestión dos viveiros de empresas.