A Cámara de Comercio de Santiago organizou hoxe unha xornada sobre as garantías e cartas de crédito standby no comercio exterior
- Detalles
- Categoría: Cámara Santiago
- Published: Martes, 29 Xuño 2010 00:00
- Visitas: 597
A nova normativa sobre garantías da Cámara de Comercio Internacional comezará a executarse a partir do vindeiro xoves, 1 de xullo
A Cámara de Comercio, Industria e Navegación de Santiago de Compostela ofreceu hoxe unha xornada sobre Garantías Internacionais a Primeiro Requerimento: Novas Normas - As URDG 758, impartida polo director de Comercio Exterior e coordinador Territorial Galicia e Castela do Banco Sabadell, Javier Balbín. Na apertura da xornada o relator estivo acompañado pola secretaria xeral da Cámara de Comercio de Santiago, Filomena Casal, e o secretario adxunto, Fernando Barros.
Durante as dúas horas de relatorio tratáronse diversos aspectos como as promesas de pago bancarias no comercio internacional, as garantías independentes e as cartas de crédito standby ou os diversos tipos de normas para garantías (URDG, ISP e UCP).
Segundo Balbín, a garantía bancaria e o standby son promesas de carácter independente, feitas por un banco, de pagar a un terceiro, a súa simple reclamación, unha suma determinada polo incumprimento dunha obriga, entre outras, as de:
- entrega de mercancía ou prestación de servizo,
- mantemento posventa,
- devolución dun pago anticipado,
- pago dunha débeda vencida.
A seguridade xurídica, económica e operativa das partes nunha garantía (ordenante ou beneficiario) reside de forma determinante nas condicións establecidas na propia garantía. Desta forma, resulta fundamental a suxeición de toda garantía a normas recoñecidas e de aceptación universal.