O Balneario de Cuntis patrocina ao piragüista galego Diego Romero, subcampeón mundial de maratón no ano 2013

“Este apoio vaime permitir adestrar e prepararme moito mellor, adquirir equipamento e aumentar o meu nivel”

A próxima meta deportiva deste mozo cuntiense de 23 anos será clasificarse para as Olimpíadas de Río de Janeiro 

O Balneario de Cuntis patrocinará ao piragüista Diego Romero durante as vindeiras tres temporadas. A través deste acordo, o mozo de 23 anos e natural da vila termal cuntiense recibe unha axuda económica e recursos materiais para a práctica do seu deporte. Tamén poderá utilizar as instalacións do centro onde contará cunha fisioterapeuta acuática personalizada. 

Romero vén de competir no Campionato de Europa de Augas Tranquilas disputado na cidade alemá de Brandemburgo, onde acadou, xunto ao seu compañeiro Tono Campos, o posto número cinco na final de C2 1.000 metros. Ámbolos dous, pertencentes ao Club Breogán de O Grove, tamén comparten título de subcampeón do mundo de Maratón en 2013 e agora estanse preparando para o mundial de Piragüismo que se celebrará en Moscova entre o 6 e o 10 de agosto. 

Un patrocinio “fundamental” que lle permitirá poñer a vista nos Xogos Olímpicos de 2016

O seu vindeiro obxectivo será clasificarse para as Olimpíadas de Río de Janeiro en 2016, un reto que considera máis difícil que o nivel que posteriormente se esixe na proba olímpica. Romero cualifica de “fundamental” o apoio que lle prestará o Balneario de Cuntis para as vindeiras temporadas. “Vaime permitir adestrar e prepararme moito mellor, adquirir equipamento e aumentar o meu nivel”, comenta. Ademais poderá incluír na súa rutina de adestramentos as terapias nas piscinas e jacuzzis do balneario, así como realizar exercicios de mantemento e rehabilitación na auga dirixidos por unha profesional do centro. 

O Balneario de Cuntis decidiu prestar o seu respaldo a este importante deportista galego “porque tiña dificultades para asumir moitos gastos derivados da súa práctica, que agora poderá afrontar con máis facilidade”. 

O piragüismo é para Diego Romero un deporte con dedicación exclusiva

Diego Romero iniciouse nesta actividade á idade de dez anos e recoñece que daquela “era moi malo e non empecei a destacar ata que cheguei á categoría senior, con 18 anos”. Hoxe en día, o piragüismo para el “non é só un deporte, senón un traballo con dedicación exclusiva”. Adestra diariamente no embalse de Verducido, lugar onde se atopa a pista olímpica de Pontillón do Castro da Federación Galega de Piragüismo. 

En Galicia a situación do piragüismo está, segundo el, “nun punto crítico a pesar de ser a rexión de España onde máis se practica. Segue sendo un deporte moi minoritario que conta con moi poucos apoios, aínda que hai moitísima afición”, agrega. Proba da calidade dos nosos deportistas admite que na súa modalidade –canoa senior– “se gañas en Galicia, gañas en España con total seguridade”.