Esta guía pretende ser un instrumento que axude ás empresas a coñecer que son os riscos psicosociais, como afectan á organización, como se poden detectar, así como o proceso que se debe seguir para evitar ou minimizar os seus efectos. A finalidade é mellorar o benestar e a saúde dos traballadores e o desenvolvemento do propio traballo.

A guía, que está dispoñible na páxina web da CEG, é o resultado dun estudo previo realizado pola entidade sobre factores de risco psicosociais por sectores. Analizouse o comercio, a hostalaría, oficinas e despachos, o transporte, a construción e a pesca. Tivéronse en conta factores de risco como o ambiente físico do posto de traballo (iluminación, ruido, temperatura, humidade, correntes de aire…), a comunicación interna na empresa, a participación dos empregados na toma de decisións, a carga de traballo, as consecuencias de traballar a quendas e a satisfacción dos traballadores.

Dende a CEG explican que “os factores psicosociais relaciónanse de maneira directa coa organización, co contido do traballo ou coa realización da tarefa. E poden afectar tanto ao benestar ou á saúde (física, psíquica ou social) do traballador como ao desenvolvemento do traballo”. Así, unhas condicións psicosociais desfavorables poden desencadear na aparición de alteracións como o estrés laboral, a síndrome do burnout (popularmente coñecido como “estar queimado”) e o acoso laboral ou mobbing.

Os indicadores de tipo laboral que alertan da presenza de factores de risco psicosocial no contorno de traballo son un maior absentismo laboral, o incumprimento dos horarios, problemas de carácter disciplinario, aumento de peticións de cambio de posto ou de quenda, así como a diminución do rendemento laboral. Pola súa parte, os indicadores médicos están vencellados coa saúde dos traballadores como o insomnio, alteracións alimenticias, dores de cabeza, problemas dermatolóxicos ou musculares, agresividade, incremento dos casos de ansiedade ou de depresión, entre outros trastornos.