A Real Filharmonía de Galicia arranca este martes cun ciclo de concertos gratuítos ao aire libre en barrios de Santiago
- Detalles
- Categoría: Uncategorised
- Published: Venres, 11 Setembro 2015 11:49
- Escrito por Eva
- Visitas: 601
Ao longo da semana celebraranse un total de cinco actuacións en Fontiñas, Vite, Conxo, San Pedro e no Ensanche
O Consorcio de Santiago presenta este luns a iniciativa, destinada a achegar a orquestra e a música clásica ao público
O Consorcio de Santiago ten o propósito de achegar cada vez máis a Real Filharmonía de Galicia e a música clásica aos cidadáns. Así, ao longo desta temporada están previstas unha serie de actuacións na rúa e noutros espazos diferentes á sede da orquestra, o Auditorio de Galicia. Nesta liña, a RFG arrancará a vindeira semana con varios concertos gratuítos ao aire libre en barrios significativos da cidade compostelá; baixo a batuta do mestre holandés afincado en Galicia Bram Sniekers. Este luns, 14 de setembro, o Consorcio de Santiago presentará esta iniciativa en rolda de prensa, ás 11:00 horas.
Ao longo da semana celebraranse un total de cinco actuacións, que terán lugar o martes 15 en Fontiñas, o mércores 16 en Vite, o xoves 17 en Conxo, o venres 18 en San Pedro e o sábado 19 no Ensanche. Cada unha destas citas musicais comezará ás 20.00 horas.
O concerto de Fontiñas celebrarase na Praza de Europa, en Área Central. O de Vite terá lugar no parque da Ponte Mantible. O de Conxo será detrás do centro sociocultural Aurelio Aguirre. A actuación do barrio de San Pedro será no xardín da Zona C de Bonaval. E, por último, o concerto programado para o Ensanche terá lugar na Praza Roxa. No caso de choiva, fixaranse espazos alternativos para cada un destes concertos.
Obras clásicas e románticas para todos os públicos
A Real Filharmonía achegará ao público unha selección de obras clásicas e románticas moi populares. Así, os concertos comezarán coa obertura de As vodas de Fígaro de Mozart. De seguido a orquestra tocará a obertura de Coroliano de Beethoven. Os asistentes tamén poderán escoitar parte da Suite nº 1 “Peer Gynt” do compositor noruegués Edvard Grieg.
Os músicos tocarán ademais a obertura de As Hébridas de Mendelssohn. A continuación interpretarán a obertura de A italiana en Alxer do compositor italiano Gioachino Rossini e os concertos rematarán cun fragmento de O soño dunha noite de verán de Mendelssohn.