O tratamento integral nos balnearios logra reducir a inxesta de medicamentos nas persoas maiores
- Detalles
- Categoría: Uncategorised
- Published: Xoves, 21 Marzo 2013 23:00
- Visitas: 695
Unha cura termal de entre 10 e 15 días consigue unha melloría física que perdura entre os 3 e 6 meses seguintes
No marco da Cátedra de Hidroloxía Médica da Universidade de Santiago e a Asociación de Balnearios de Galicia, o balneario de Arnoia acolle mañá sábado unha sesión sobre a atención a persoas maiores nos balnearios. A coordinadora é Dolores Fernández Marcos, directora médico de Caldaria Termal, que aglutina os balnearios ourensáns de Arnoia, Laias (no concello de Cenlle) e Lobios.
A doutora salienta que “o paciente xeriátrico debe tratarse na súa globalidade, é dicir, tendo en conta todo o que significa o envellecemento”. Nesta liña, incide en que a marcha e o movemento do corpo en xeral é máis lento, a pel móstrase máis fráxil, xorden problemas no aparato circulatorio, entre outros moitos aspectos. A este conxunto de dificultades engádese a toxicidade que provoca no paciente a inxesta de medicamentos diversos, xa que en idades avanzadas adoitan coexistir varias doenzas crónicas como é o caso da tensión arterial elevada ou o colesterol.
“Intentamos aglutinar todos estes factores na terapia termal con persoas maiores, de cara a mellorar a súa mobilidade, fortalecer a pel senil, mellorar o fluxo circulatorio, diminuír os edemas nas pernas inchadas e a dor en xeral. E, en consecuencia, lograr reducir o consumo de medicamentos” -manifesta a doutora-. Fernández Marcos afirma que a finalidade deste tratamento integral é contribuír ao envellecemento activo das persoas da terceira idade.
A doutora sinala que os maiores acoden ao balneario entre dez e quince días seguidos. “O resultado é unha importante melloría física que perdura no tempo, entre os tres e seis meses seguintes consiguen ter unha boa calidade de vida. E eles mesmos xa notan cando teñen que volver ao balneario para sentirse ben de novo” -apunta-. Nos centros termais as persoas maiores son atendidas por un equipo interdisciplinar de especialistas, entre os que se atopan médicos, fisioterapeutas, masaxistas e nutricionistas, entre outros.