Inicio

A Cámara de Comercio de Santiago tramita certificados de exportación para as empresas de Ferrol

A Comisión xestora da entidade ferrolá autoriza a Santiago a expedir os documentos para evitar prexuízos ao empresariado da demarcación

A Cámara de Comercio, Industria, Servizos e Navegación de Santiago de Compostela pode emitir desde esta semana certificados de orixe, legalización de facturas e tramitación doutros documentos de exportación para as empresas da demarcación de Ferrol.

A Comisión xestora da entidade cameral ferrolá, nomeada pola Dirección Xeral de Comercio, autorizou á Cámara de Santiago a expedir certificados de orixe e demais trámites que precisan as empresas para a exportación e así evitar os prexuízos que esta situación puidera ocasionar ao empresariado da zona.

O técnico de Promoción Internacional da Cámara de Santiago, Fernando Pérez-Soba, explica que os expedientes de certificación son un proceso sinxelo que permite legalizar a sinatura da empresa. “Enviamos ás empresas uns archivos para cumplimentar e en 24 horas xa están activas e autorizadas para certificar internacionalmente” –sinala–.

O certificado de orixe é un documento que acredita que as mercadorías son orixinarias dun determinado país ou territorio. A orixe está determinada polo país onde foi fabricado o produto ou onde sufriu a última transformación substancial. Este documento serve para acreditar a orixe das mercadorías que se importan ou exportan, identificando a súa natureza, número de bultos, peso bruto e neto ou nome do expedidor, condicionando o tratamento arancelario ou comercial que se de aos produtos no momento da súa entrada no territorio aduaneiro, xa que se aplican tipos arancelarios, controis aduaneiros, sanitarios ou comerciais diferenciados segundo o país de orixe.