Inicio

Detalles

Categoría: Cámara Comercio Santiago

Published: Sábado, 09 Novembro 2013 13:42

Escrito por Eva

Visitas: 363

A idea é dotar de habilidades web a desempregados e micropemes

Colaborará con empresas e entidades de Grecia, Turquía, República Checa, Irlanda, Eslovenia e Lituania

A Cámara de Comercio, Industria e Navegación de Santiago de Compostela participa nun proxecto Leonardo da Unión Europea, baseado en abrir o emprendemento en Europa aos desempregados por medio das ferramentas 2.0 e os servizos da nube, titulado Entrepreneur 2.0. O proxecto foi aprobado en xuño de 2013 e terá continuidade ata xullo de 2015.

O obxectivo deste proxecto é equiparar e dotar aos emprendedores, especialmente aos novos desempregados e donos de micropemes, de habilidades e capacidades para o manexo de ferramentas interactivas 2.0 para converterse en emprendedores de éxito nos mercados situados fóra das súas fronteiras.

O proxecto conta coa participación de varios socios e colaboradores como a empresa NSF Cyberall Access de Grecia, a Cámara de Comerciantes e Artesáns de Eskisehir de Turquía, a Cámara de Comercio de Praga na República Checa, o centro tecnolóxico do Condado de Dun Laoghaire en Rathdown, en Irlanda, a consultora de internacionalización Odobreno de Eslovenia, e os creadores de opinión Think Tank LT de Lituania, ademais da Cámara de Comercio de Santiago.

A entidade cameral de Compostela asistirá a oito reunións con visitas aos socios do proxecto. A primeira xuntanza celebrouse os días 7 e 8 de outubro en Atenas, á que asistiu a técnico de Proxectos da Cámara de Comercio, Belén Mendoza. A próxima reunión do proxecto celebrarase no mes de febreiro en Irlanda co obxectivo específico de intercambiar experiencias en materia de emprendemento, especialmente relacionadas coas novas tecnoloxías, establecer un itinerario formativo para 2014-2015, deseñar un catálogo de servizos e ferramentas baseadas na web 2.0 e na nube e crear un grupo de profesores e mentores expertos.

A intervención neste tipo de proxectos, permitirá á Cámara de Comercio cooperar a nivel europeo, establecer unha rede de contactos en materia de emprendemento,  contar cun catálogo actualizado de ferramentas e materiais accesibles para emprendedores que queiran saír ao exterior a baixo custo e uns contidos para formación de desempregados baseados nas novas tecnoloxías.